La Dua Libro De Nifai

Ĉapitro 32

1. Kaj nun, miaj amataj fratoj, mi supozas, ke en viaj koroj vi iom pripensas pri tio, kion vi faru post kiam vi eniras sur la vojon. Sed, kial vi pripensas tion en viaj koroj?

2. Ĉu vi ne memoras, ke mi diris al vi, ke, ricevinte la Sanktan Spiriton, vi povos paroli per la lingvo de anĝeloj? Kaj nun, kiel vi povus paroli per la lingvo de anĝeloj krom nur per la Sankta Spirito?

3. Anĝeloj parolas per la potenco de la Sankta Spirito; pro tio ili parolas la vortojn de Kristo. Tiel mi diris al vi, festenu je la vortoj de Kristo; ĉar jen la vortoj de Kristo diros al vi ĉion, kion vi faru.

4. Tial, nun, post kiam mi diris ĉi tiujn vortojn, se vi ne povos kompreni ilin, tio estos ĉar vi nek demandas nek frapas; pro tio, vi ne estas alkondukitaj en la lumon, sed devos perei en la mallumo.

5. Ĉar, aŭdu, denove mi diras al vi, ke, se vi eniros per la vojo kaj ricevos la Sanktan Spiriton, ĝi montros al vi ĉion, kion vi devus fari.

6. Aŭdu, jen la doktrino de Kristo, kaj plia doktrino ne estos donita ĝis post kiam li montros sin en la karno al vi. Kaj, kiam li montros sin en la karno al vi, tiam vi nepre observu tion, kion li diros al vi.

7. Kaj nun mi, Nifai, ne povas diri plu; la Spirito haltigas mian parolpovon, kaj restas al mi plori pro la nekredemo kaj la malvirteco kaj la nescio kaj la malmolnukeco de la homoj; ĉar ili ne volas serĉi scion, aŭ kompreni grandan scion, kiam oni klare donas ĝin al ili eĉ tiel klare kiel vortoj povas esti.

8. Kaj nun, miaj amataj fratoj, mi vidas, ke vi ankoraŭ pripensas en viaj koroj; kaj estas tre malĝojige al mi, ke mi devas paroli pri ĉi tio. Ĉar, se vi aŭskultus la Spiriton, kiu instruas al la homo preĝi, vi scius, ke vi preĝu; ĉar la malvirta spirito ne instruas al la homo preĝi, sed instruas al li, ke li ne preĝu.

9. Kaj, aŭdu, mi diras al vi, ke vi devas ĉiam preĝi, kaj ne laciĝi; ke vi devos ne fari ion antaŭ la Sinjoro sen antaŭa preĝado al la Patro en la nomo de Kristo, por ke li sanktigu viajn agojn por vi, por ke viaj agoj estu por la bona farto de via animo.